കേരളത്തിൻറെ AI നിമിഷം
കേരളം AI എങ്ങനെ കൈകാര്യം ചെയ്യണമെന്ന് വിശകലനം ചെയ്യുകയും, അതിൻറെ സാധ്യതകൾ പരമാവധി വർദ്ധിപ്പിക്കുന്നതിനായുള്ള നയങ്ങൾ ചർച്ച ചെയ്യുകയും ചെയ്യുന്നു
ആർട്ടിഫിഷ്യൽ ഇന്റലിജൻസ് (AI) ആഗോള സമ്പദ് വ്യവസ്ഥയിൽ കാര്യമായ സ്വാധീനം ചെലുത്തുമെന്ന് വിദഗ്ദർ അഭിപ്രായപ്പെടുന്നു. ഇൻറ്റർനാഷണൽ മോണിറ്ററി ഫണ്ട് നടത്തിയ 2024ലെ പഠനം പ്രവചിച്ചത് “ആഗോള തലത്തിൽ 40% തൊഴിലുകളിലും AI സ്വാധീനം ഉണ്ടാവുമെന്നാണ്. വികസിത രാജ്യങ്ങളിൽ ഈ സ്വാധീനം കൂടുതലായിരിക്കുമെന്നും, അതിനാൽ തന്നെ AI മൂലം ഉണ്ടാവുന്ന ഗുണങ്ങൾ ചൂഷണം ചെയ്യാൻ ഈ രാജ്യങ്ങളായിരിക്കും കൂടുതൽ സജ്ജമെന്നും ഈ പഠനം ചൂണ്ടികാണിക്കുന്നു.
ഇതേ പഠനം പറയുന്നത് ഇന്ത്യയിൽ 26% തൊഴിലുകളിൽ മാത്രമാണ് AI സ്വാധീനം ഉണ്ടാവാൻ സാധ്യത എന്നതാണ് (ചിത്രം 1 കാണുക). ഇന്ത്യയിലെ മിക്ക തൊഴിലുകളും ശാരീരിക അധ്വാനം വേണ്ടതും, കുറഞ്ഞ വൈദഗ്ധ്യമുള്ളതുമാണ്. അതിനാൽ ഇത്തരം ജോലികളിൽ AI സംയോജനത്തിൻറെ സാധ്യതകൾ കുറവാണ്.
ഇതിനർത്ഥം AI മൂലം ഇന്ത്യയിൽ വലിയ തൊഴിൽ മാറ്റങ്ങൾ ഉണ്ടാവില്ല എന്നതാണ്. അതേസമയം AI-യുടെ നേട്ടം കൈവരിക്കാൻ ഇന്ത്യ മോശമായ അവസ്ഥയിലാണെന്നും ഇതിനർത്ഥം.
സ്റ്റേറ്റ് ഓഫ് ഇന്ത്യാസ് ഡിജിറ്റൽ ഇക്കണോമി റിപ്പോർട്ട് 2024 പ്രകാരം ഇന്ത്യയിൽ ഏറ്റവും കൂടുതൽ ഡിജിറ്റലൈസേഷൻ സ്കോർ നേടിയ ആറാമത്തെ സംസ്ഥാനമാണ് കേരളം. കൂടാതെ, സംസ്ഥാനം സേവന മേഖലയെ വളരെയധികം ആശ്രയിക്കുകയും നോളേജ് ഇക്കോണമി ശ്രമിക്കുകയുമാണ്. ഇന്ത്യയിലെ ആദ്യത്തെ ഡിജിറ്റൽ സാക്ഷരതയുള്ള സംസ്ഥാനമായി കേരളം അടുത്തിടെ മാറി. സേവന മേഖലയെയും ഡിജിറ്റൽ സമ്പദ് വ്യവസ്ഥയെയും ആശ്രയിക്കുന്ന സംസ്ഥാനമായി കേരളം മാറുകയാണ്. AI വികസിക്കുകയും വ്യാപിക്കുകയും ചെയ്യുമ്പോൾ സവിശേഷമായ വെല്ലുവിളികളും അവസരങ്ങളും ഇതിനാൽ കേരളത്തിൽ ഉണ്ടാവുന്നു. ഈ പശ്ചാത്തലത്തിലാണ് കേരളം AI എങ്ങനെ പ്രയോജനപ്പെടുത്താം എന്നതിനെക്കുറിച്ച് ചിന്തിക്കാൻ തുടങ്ങേണ്ടത്.
AI വ്യാപനത്തിൻറെ നാല് സാഹചര്യങ്ങൾ
രാജ്യത്ത് ആർട്ടിഫിഷ്യൽ ഇന്റലിജൻസ് വ്യാപിക്കുന്നതിന് നാല് സാഹചര്യങ്ങൾ സാധ്യമാണെന്ന് തക്ഷശില ഇൻസ്റ്റിട്യൂഷൻ ഡയറക്ടർ നിതിൻ പൈ ഒരു ലേഖനത്തിൽ വിശദീകരിക്കുന്നു. ഇവ താഴെപ്പറയുന്ന രീതിയിൽ ദൃശ്യവൽക്കരിക്കാം:
ട്രാൻസ്ഫോർമേറ്റീവ് ഓട്ടോമേഷൻ - AI അതിവേഗം പരിവർത്തനം ചെയ്യപ്പെടുകയും പല മേഖലകളിലും വ്യാപിക്കുകയും ചെയ്യുന്നു. ഇത് ജോലികൾ യന്ത്രികമാക്കുകയും (automate) ചെയ്യുകയും അതുവഴി ഈ മേഖലകളിലെ തൊഴിലാളികൾക്ക് ഭീഷണി ആവുകയും ചെയ്യുന്നു.
ട്രാൻസ്ഫോർമേറ്റീവ് ഓഗ്മെൻറേഷൻ - AI അതിവേഗം പരിവർത്തനം ചെയ്യുന്നു, പക്ഷേ ഇത് ജോലികൾ ഓട്ടോമേറ്റ് ചെയ്യുന്നില്ല. മറിച്ച് ഇത് തൊഴിലാളികളെ സഹായിക്കുകയും അവരുടെ ഉൽപ്പാദനക്ഷമത മെച്ചപ്പെടുത്തുകയും ചെയ്യുന്നു.
ഇൻക്രിമെൻറൽ ഓട്ടോമേഷൻ - AI പതിയെ വ്യാപിക്കുകയും, കൂടുതൽ മേഖലകളെ ബാധിക്കാതിരിക്കുകയും ചെയ്യുന്നു. എന്നാൽ അത് ബാധിക്കുന്ന മേഖലകളിൽ, ജോലികൾ യാന്ത്രികവും തൊഴിലാളികളെ മാറ്റിസ്ഥാപിക്കുന്നതുമാണ്.
ഇൻക്രിമെൻറൽ ഓഗ്മെൻറേഷൻ - AI പതിയെ വ്യാപിക്കുകയും, അത് ബാധിക്കുന്ന മേഖലകളിലെ തൊഴിലാളികളുടെ ഉൽപ്പാദനക്ഷമത വർദ്ധിപ്പിക്കുകയും ചെയ്യുന്നു.
ഈ സാഹചര്യങ്ങളിൽ, ട്രാൻസ്ഫോർമേറ്റീവ് ഓഗ്മെൻറേഷൻ ആണ് ഇന്ത്യയെ സംബന്ധിച്ചിടത്തോളം ഏറ്റവും മികച്ച സാഹചര്യമായിരിക്കുമെന്ന് നിതിൻ പൈ നിർദ്ദേശിക്കുന്നു. AI അതിവേഗം പരിവർത്തനപ്പെടുന്നതിനാൽ ശാരീരിക അധ്വാനം കൂടുതലുള്ള, കുറഞ്ഞ വൈദഗ്ധ്യം ആവശ്യമായുള്ള തൊഴിൽ മേഖലകളെയും സ്വാധീനിക്കാൻ ഇടയുണ്ട് എന്നതാണ് ഇതിന് കാരണം. ഇത് ഓഗ്മെൻറേഷൻ ആയതിനാൽ, ഇത് തൊഴിലാളികളെ മാറ്റിസ്ഥാപിക്കുകയല്ല, പകരം അവരുടെ ഉൽപ്പാദനക്ഷമത മെച്ചപ്പെടുത്താൻ സഹായിക്കുകയും ചെയ്യുന്നു. ഉൽപ്പാദനക്ഷമത വർദ്ധിക്കുന്നതിലൂടെ ഈ മേഖലകളിലെ വരുമാനവും വർദ്ധിപ്പിക്കുന്നു.
അത്തരമൊരു സാഹചര്യം കേരളത്തിനും അനുകൂലമായിരിക്കും. എന്നാൽ നമ്മുടെ നയങ്ങൾ എല്ലാ സാഹചര്യങ്ങളുടെയും പ്രത്യാഘാതങ്ങൾ പരിഗണിക്കുകയും അവ കൈകാര്യം ചെയ്യാൻ പ്രാപ്തമാവുകയും വേണം.
കേരളവും AI നയങ്ങളും
ഇന്ത്യയുടെ AI സംവിധാനവും നയങ്ങളും നയിക്കുന്നത് ഇന്ത്യാAI മിഷനാണ്. ഇതിനായി നീതി ആയോഗ് ഒരു ദേശീയ നയതന്ത്രവും ആവിഷ്കരിച്ചിട്ടുണ്ട്. ഇത്തരം വിശാലമായ ദേശീയ തന്ത്രങ്ങൾ ഉപയോഗപ്രദമാണെങ്കിലും, കൂടുതൽ പ്രാദേശികവൽക്കരിച്ച നയങ്ങളും റോഡ്മാപ്പുകളും അനിവാര്യമാണ്.
സംസ്ഥാന ലിസ്റ്റിലോ കൺകറൺട് ലിസ്റ്റിലോവരുന്ന പൊതുജനാരോഗ്യം, കൃഷി, വിദ്യാഭ്യാസം തുടങ്ങിയ മേഖലകളെ സ്വാധീനിക്കാൻ AIക്ക് കഴിവുണ്ട്. സംസ്ഥാനങ്ങൾക്ക് അവരുടേതായ AI നയങ്ങൾ ഉണ്ടാക്കാൻ ഇതിനാൽ ആവശ്യകത ഉണ്ടാവുന്നു. വ്യവസായങ്ങൾ, ജീവനക്കാർ, വിദ്യാർത്ഥികൾ, തിങ്ക് ടാങ്കുകൾ, സിവിൽ സൊസൈറ്റി തുടങ്ങിയ പ്രധാന പങ്കാളികളുടെ ഒരു ടീം ഇതിനായി കേരള സർക്കാർ രൂപീകരിക്കണമെന്ന് ഞങ്ങൾ നിർദ്ദേശിക്കുന്നു.
റോഡ്മാപ്പിൽ കേരളം ശ്രദ്ധ കേന്ദ്രീകരിക്കേണ്ട ചില മേഖലകൾ ഇവയായിരിക്കണം:
കേരളത്തിനായുള്ള ഉപയോഗങ്ങൾ - രാജ്യത്തിൻറെ മറ്റ് ഭാഗങ്ങളെ അപേക്ഷിച്ച് കേരളത്തിലെ പ്രശ്നങ്ങൾ വ്യത്യസ്തമാണ്. ഇതിന് സംസ്ഥാനത്തിന് പ്രത്യേകമായി ഉപയോഗങ്ങൾ (use cases) രൂപപ്പെടുത്തേണ്ടതുണ്ട് (അടുത്ത ഭാഗത്തിൽ ഞങ്ങൾ ചിലത് നിർദ്ദേശിക്കുന്നു). AI അടിസ്ഥാനമാക്കിയുള്ള ഈ ഉപയോഗങ്ങൾ പര്യവേക്ഷണം ചെയ്യാൻ വ്യവസായങ്ങളെ പ്രോത്സാഹിപ്പിക്കണം.
സർക്കാർ ഉപയോഗം - കേരള ഹൈക്കോടതി AI ഉപയോഗത്തിന് മാർഗ്ഗനിർദ്ദേശങ്ങൾ നല്കിയതുപോലെ, കേരള സർക്കാരും ഉദ്യോഗസ്ഥർക്ക് മാർഗ്ഗനിർദ്ദേശങ്ങൾ നൽകണം. AI ഉപയോഗിക്കാൻ കഴിയുന്ന മേഖലകൾ, ഡാറ്റാ സെക്യൂരിറ്റി പ്രോട്ടോക്കോളുകൾ, AI സംയോജിപ്പിക്കുന്നതിനുള്ള സ്റ്റാഫ് പരിശീലനം, AI പ്രയോഗിക്കുന്നതിൽ ജാഗ്രത പാലിക്കേണ്ട മേഖലകൾ എന്നിവ നിർവചിക്കണം.
പ്രോ-വർക്കർ AI - കാലങ്ങളായുള്ള സാങ്കേതിക പുരോഗതി ഒരു ചെറിയ വരേണ്യവിഭാഗത്തെ സമ്പന്നമാക്കി, അതേസമയം പലരെയും മോശമായി ബാധിച്ചു എന്ന് സാമ്പത്തിക ശാസ്ത്രജ്ഞരായ ഡാരോൺ അസെമോഗ്ലു, സൈമൺ ജോൺസൺ എന്നിവർ പവർ ആൻഡ് പ്രോഗ്രസ് എന്ന പുസ്തകത്തിൽ പറയുന്നു. AI ഇത് കൂടുതൽ വഷളാക്കിയേക്കാം. അത്തരമൊരു സാഹചര്യത്തിൽ, പുതിയ ജോലികൾ സൃഷ്ടിക്കുന്നതിനും വിദ്യാഭ്യാസമില്ലാത്തവരും കുറഞ്ഞ വൈദഗ്ധ്യമുള്ളവരുമായ തൊഴിലാളികൾക്ക് വേണ്ടി AI ഉപയോഗിക്കുന്നതിനുള്ള വഴികൾ കണ്ടെത്തുന്ന നയങ്ങൾ ആവശ്യമാണ്. കേരളത്തിലെ വ്യവസായങ്ങളുമായി ചേർന്ന് ഒരു പ്രോ-വർക്കർ AI മാതൃക കൊണ്ടുവരാൻ സർക്കാർ ശ്രമിക്കണം.
AI സാക്ഷരതാ പരിപാടികൾ - ഡിജിറ്റൽ സാക്ഷരത പദ്ധതികളിലും, അക്ഷയ കേന്ദ്രങ്ങളിലൂടെ ഡി.പി.ഐ ജനങ്ങളുമായി ബന്ധിപ്പിക്കുന്നതിലും കേരളം രാജ്യത്തെ നയിച്ചു. AI സാക്ഷരതയിൽ മുൻകൈയെടുക്കാൻ സംസ്ഥാനം സുസജ്ജമാണ്. AIയെ കുറിച്ചുള്ള അടിസ്ഥാന വിവരങ്ങൾ, അതിൻറെ ഉപയോഗങ്ങൾ, ഈ സാങ്കേതികവിദ്യ എങ്ങനെ ഉപയോഗിക്കാം (എങ്ങനെ ഉപയോഗിക്കരുത്) എന്നിവ ആളുകൾക്ക് ഇതിലൂടെ പരിചയപ്പെടുത്താം.
കേരളത്തിനായുള്ള ഉപയോഗങ്ങൾ
നിലവിലുള്ള പല പ്രശ്നങ്ങളും പരിഹരിക്കാൻ കേരളത്തിന് AI ഉപയോഗിക്കാം. സാങ്കേതികവിദ്യ വികസിക്കുമ്പോൾ ഈ ഉപയോഗങ്ങൾ നിർവചിക്കുകയും കൂടുതൽ മേഖലകൾ കൊണ്ടുവരികയും ചെയ്യേണ്ടതുണ്ട്. AIയുടെ നിലവിലെ കഴിവുകളെ അടിസ്ഥാനമാക്കിയുള്ള ചില ഉപയോഗങ്ങൾ ഇവിടെ പറയുന്നു:
വിദ്യാർത്ഥികൾക്കായി AI ട്യൂട്ടർ - കേരളത്തിലെ ഗോത്രവർഗ വിദ്യാഭ്യാസത്തിലെ പ്രശ്നങ്ങളെക്കുറിച്ച് ഞങ്ങൾ മുൻപ് എഴുതിയിട്ടുണ്ട്. ജെമിനൈ പോലുള്ള AI ഉപയോഗിച്ച് വിദ്യാർത്ഥികൾക്കായി ട്യൂട്ടർമാരെ വികസിപ്പിച്ചുകൊണ്ട് ഇത് ഒരുപരിധിവരെ പരിഹരിക്കാനാകും (അത്തരമൊരു ട്യൂട്ടറിനെ ഇവിടെ വിവരിച്ചിരിക്കുന്നു). ഈ AIക്ക് വിദ്യാർത്ഥികളുടെ കഴിവുകളുടെയും താൽപ്പര്യങ്ങളുടെയും അടിസ്ഥാനത്തിൽ പഠനം ക്രമീകരിക്കാൻ കഴിയും. കൂടാതെ, പ്രാദേശിക ഭാഷകളുടെ പരിജ്ഞാനം AI വികസിപ്പിക്കുന്നതിലൂടെ, ഗോത്ര പശ്ചാത്തലങ്ങളിൽ നിന്നുള്ള വിദ്യാർത്ഥികൾക്ക് അവരുടെ മാതൃഭാഷയിലുള്ള പഠനം നമുക്ക് ഉറപ്പാക്കാൻ കഴിയും.
കാലാവസ്ഥാ, ദുരന്ത പ്രവചനം - പ്രകൃതി ദുരന്തങ്ങളുടെ വർദ്ധനവിന് കേരളം ഇന്ന് സാക്ഷ്യം വഹിക്കുന്നു. നാം മുന്നോട്ട് പോകുമ്പോൾ കാലാവസ്ഥാ സാഹചര്യങ്ങളെയും ദുരന്തങ്ങളെയും കുറിച്ചുള്ള കാര്യക്ഷമമായ പ്രവചനം ഉണ്ടാക്കുന്നത് നിർണായകമാകും. കൂടുതൽ കാര്യക്ഷമമായി കാലാവസ്ഥ പ്രവചിക്കുന്നതിനായി പരിശീലനം ലഭിച്ച AI ഇതിനായി നമുക്ക് ഉപയോഗിക്കാം. ഇവിടെ ഒരു മാതൃക ചർച്ചചെയ്യുന്നു.
രോഗവ്യാപന നിയന്ത്രണം - പ്രകൃതിദുരന്തങ്ങൾക്ക് സമാനമായി നിപ, മങ്കിപോക്സ് തുടങ്ങിയ രോഗങ്ങളും കേരളത്തിൽ വർദ്ധിക്കുന്നുണ്ട്. സംസ്ഥാനത്തിൻറെ ഉഷ്ണമേഖലാ കാലാവസ്ഥ, കുടിയേറ്റം, പ്രായമായ ജനസംഖ്യ എന്നിവ ഭാവിയിൽ കൂടുതൽ പകർച്ചവ്യാധികൾക്ക് കാരണമാവാൻ ഇടയുണ്ട്. പകർച്ചവ്യാധികൾ നിയന്ത്രിക്കുന്നതിനായി AI-യെ മികച്ച രീതിയിൽ സ്ഥാപിക്കാൻ കഴിയുമെന്ന് പഠനങ്ങൾ പറയുന്നു. ഇത് കേരളം പര്യവേക്ഷണം ചെയ്യേണ്ട ഒരു ഉപയോഗമാണ്.
വ്യക്തിഗത ജെറിയാട്രിക് കെയർ - കേരളത്തിന് അതിവേഗം പ്രായമാകുകയാണ്. ഈ ജനസംഖ്യാപരമായ വാർദ്ധക്യം സംസ്ഥാനത്ത് അവികസിതമായി തുടരുന്ന ജെറിയാട്രിക് കെയർ സേവനങ്ങളുടെ ആവശ്യകത പുറത്തുകൊണ്ടുവരുന്നു. പ്രായമായവരെ പരിപാലിക്കുന്ന ഒരു AI അസിസ്റ്റൻറിന് ചില വിടവുകൾ നികത്താൻ കഴിയും. പ്രായമായവർക്ക് വൈകാരിക പിന്തുണ നൽകാനും AIയെ പരിശീലിപ്പിക്കാനാവും.
നിയമസംവിധാനം - നിയമസംവിധാനത്തിൽ സാങ്കേതികവിദ്യയുടെ ആവശ്യകതയെക്കുറിച്ച് കൊല്ലത്തെ ഓൺ കോർട്ട്സ് സംവിധാനത്തെക്കുറിച്ചുള്ള ഒരു പഠനത്തിൽ ഞങ്ങൾ മുമ്പ് എഴുതിയിട്ടുണ്ട്. നമ്മുടെ സ്വപ്ന നയ പരിഷ്കാരങ്ങളിൽ രാജ്യത്തെ കോടതികളിലെ പ്രശ്നങ്ങളും ഞങ്ങൾ പങ്കുവെച്ചു. കോടതികളുടെ പതിവ് ഭരണപരമായ പ്രവർത്തനങ്ങൾ വർദ്ധിപ്പിക്കാനും ജഡ്ജിമാരുടെയും അഭിഭാഷകരുടെയും ഉൽപ്പാദനക്ഷമത ഒരുപോലെ മെച്ചപ്പെടുത്താനും AIക്ക് കഴിയും.
അണക്കെട്ട് പരിപാലനം - കേരളം ജലവൈദ്യുതിയെ വളരെയധികം ആശ്രയിക്കുന്നു. KSEB 61ഉം, ജലസേചന വകുപ്പ് 20ഉം, കേരള ജല അതോറിറ്റി 2ഉം അണക്കെട്ടുകൾ നിയന്ത്രിക്കുന്നു. കാലവർഷത്തിൽ ഈ അണക്കെട്ടുകളുടെ നിയന്ത്രണം പലപ്പോഴും വാർത്ത ആവാറുണ്ട്. അണക്കെട്ടുകളുടെ മോശം നടത്തിപ്പാണ് 2018ലെ വെള്ളപ്പൊക്കത്തിന് കാരണമായതെന്ന് ചില പഠനങ്ങൾ പറയുന്നു. കൂടാതെ, മുല്ലപ്പെരിയാർ പോലുള്ള അണക്കെട്ടുകൾ 125 വർഷത്തിലേറെയായി പ്രവർത്തിക്കുന്നു. അവയുടെ സുരക്ഷയെക്കുറിച്ചുള്ള ആശങ്കകൾ നിരന്തരമായ ചർച്ചകൾക്കും ആശങ്കകൾക്കും കാരണമാവുന്നു. ഈ സാഹചര്യത്തിൽ, അണക്കെട്ട് പരിപാലനത്തിൽ AI സംയോജനം ഗുണം ചെയ്യും. കഖോവ്ക അണക്കെട്ടിൻറെ സമീപകാല ഉദാഹരണം ഇതിൽ AI എങ്ങനെ സഹായിക്കുമെന്ന് കാണിക്കുന്നു.
മുന്നോട്ടുള്ള വഴി
എല്ലാ സാങ്കേതികവിദ്യകളെയും പോലെ AI പ്രതിസന്ധികളും അവസരങ്ങളും കൊണ്ടുവരുന്നു. ഇവിടെ പങ്കിട്ട ആശയങ്ങൾ ഒരു തരത്തിലും സമഗ്രമല്ല. വിവിധ മേഖലകളിൽ നിന്നുള്ള ആളുകൾക്ക് പുതിയ കാഴ്ചപ്പാടുകൾ ഇതിലേക്ക് കൊണ്ടുവരാൻ കഴിയും. ഈ ആശയങ്ങൾ ശേഖരിക്കുക, ക്രിയാത്മകമായ ചർച്ചകൾ നടത്തുക, ഈ പരിവർത്തന സാങ്കേതികവിദ്യ നമ്മുടെ നേട്ടത്തിനായി ഉപയോഗിക്കുന്നതിനുള്ള തന്ത്രങ്ങൾ രൂപപ്പെടുത്തുക എന്നിവയാവണം സർക്കാരിൻറെ ലക്ഷ്യം.
 | A guest post by
|